Հավի միսը բանջարեղենով 

   Չինական ոճով պատրաստած բոլոր ուտեստները մի տեսակ յուրահատուկ են ստացվում. չսիրել չի լինում, կշտանալ չի լինում: Նման մի անմահական ընթրիք էլ էս է՝ թեթև, շատ համով, օգտակար! Մեր տան ամենասիրելիներից է:) 

Բաղադրությունը

Հավի կրծքամիս - 200գ

Սմբուկ - 2 հատ

Բիբար - 1 հատ

Գազար - 1 հատ

Սոխ - 1 հատ

Սխտոր - 3-4 պճեղ

Կոճապղպեղ (թարմ) - 3 պճեղ սխտորի չափով

Բուսայուղ - 4 ճ/գ

Սոյայի սոուս - 2 ճ/գ

Օրեգանո (չոր) - կես թ/գ

Սև պղպեղ

Աղ

Քունջութ (մատուցելու համար)

Պատրաստումը

Սմբուկները երկարավուն կտրատել, վրան աղ անել, թողնել մոտ  5 րոպե, որ դառը հյութը միջից դուրս գա:

Երկարավուն կտրատել նաև մնացած բաղադրիչները:

Բուսայուղով մի թեթև տապակել սոխը, սխտորն ու կոճապղպեղը: Ավելացնել հավի կրծքամիսն ու տապակել մինչև մսի պատրաստ լինելը (միսը ցանկալի է տապակել ոչ ուժեղ կրակին և թավայի կափարիչը փակ): 

Սմբուկներից քամել դուրս եկած դառը հյութն ու ավելացնել տապակային, մի փոքր տապակել,  հետո լցնել նաև գազարն ու բիբարը: 

Վերջում համեմել, լցնել սոյայի սոուսն ու անջատել կրակը:

Մատուցելիս վրան քունջութ ցանել: